महालसीकरण 1 लाख 46 हजार लाभार्थ्यांनी घेतला लाभ

सांगली : सांगली जिल्ह्यामध्ये कोविड-19 लसीकरण मोहिम सुरू असून बुधवार, दि. 15 सप्टेंबर 2021 या दिवशी दीड लाख लाभार्थ्यांसाठी कोविड-19 महालसीकरण अभियान दिवस राबविण्यात आला. महालसीकरण मोहिमेला उत्तम प्रतिसाद मिळाला असून जिल्ह्यामध्ये एकूण 1 लाख 46 हजार लाभार्थ्यांनी कोविड महालसीकरण मोहिमेचा कोविड लस घेवून लाभ घेतला. त्याबद्दल जिल्ह्यातील सर्व लोकप्रतिनिधी, सर्व सहभागी विभाग व लाभार्थी यांचे जिल्हा प्रशासनामार्फत अभिनंदन करण्यात येत आहे. संभाव्य तिसऱ्या लाटेचा यशस्वी मुकाबला करण्यासाठी एकही कोविड लसीचा डोस न घेतलेल्या सर्व जनतेने लवकरात लवकर लसीकरण करून घ्यावे आणि आपले व कुटुंबाचे संरक्षण करावे, असे आवाहन जिल्हाधिकारी डॉ. अभिजीत चौधरी व जिल्हा परिषदेचे मुख्य कार्यकारी अधिकारी जितेंद्र डुडी यांनी केले आहे.

            या मोहिमेत कोविड-19 लसीकरणाचा एकही डोस न घेतलेल्या व पहिला डोस घेतलेल्या नागरिकांना दुसरा डोस देण्याकरिता जिल्ह्यामध्ये एकूण 594 लसीकरण सत्रांचे नियोजन करण्यात आले होते. यामध्ये आरोग्य विभागाच्या सर्व अधिकारी व कर्मचाऱ्यांसह प्राथमिक व माध्यमिक शिक्षण विभाग, ग्रामपंचायत विभाग, महिला बाल कल्याण विभाग इत्यादी विभागांच्या अधिकारी व कर्मचारी यांच्या सक्रिय सहभागाचे नियोजन करण्यात आले होते. शिक्षण विभागाने आपल्या विद्यार्थ्यांच्या पालकांची आणि अंगणवाडी विभागाने त्यांच्या बालकांच्या पालकांच्या लसीकरणाची जबाबदारी यशस्वीरित्या पार पाडलेली आहे. ग्रामपंचायत विभागाने गावपातळीवर प्रचार व प्रसिध्दी, मनुष्यबळाची उपलब्धता, वाहतुकीची व्यवस्था इत्यादीव्दारे महत्वाचे योगदान दिले.

            जिल्हा प्रशासनाच्या आवाहनाला जिल्ह्यातील सर्व लोकप्रतिनिधींनी सर्व स्तरावर सक्रीय सहभाग नोंदवून लाभार्थ्यांच्या लसीकरणामध्ये अत्यंत महत्वाची जबाबदारी पार पाडून उत्तम प्रतिसाद दिला आहे.